話特首林鄭係工作狂真係冇錯㗎，周日通常繼續工作冇day off，好似噚日咁，出席完亞太經合組織會議後，朝早先喺越南峴港送國家主席習近平機，下午返港後唔係返禮賓府休息，而係喺機場政府貴賓室同澳洲總理特恩布爾會面（圖），保安局局長李家超同創新及科技局局長楊偉雄都陪同接見。
娥特話香港同澳洲有密切聯繫，期望兩地經貿關係未來會提升到新台階，又鼓勵澳洲企業落戶香港，掌握一帶一路帶來嘅商機。
原來特恩布爾係卅幾年來首位訪港嘅在位澳洲總理。而娥特其實兩年前曾經以政務司司長身份訪問澳洲，佢就住當時獲澳洲政府盛情款待向對方表示謝意。