關於前行政長官曾蔭權被控接受利益罪，因重審時陪審團一如初審情況，未能達成裁決共識，法官解散陪審團，法官於十一月六日頒令，除非法庭有進一步指示，否則暫不會再次展開司法程序。
以簡單說話講，控方（律政司代表特區政府）現在不再要求三審，但留下一手，將來如有必要，例如有新證據，可能會向法庭要求第三次審訊同一控罪，懸掛在曾蔭權頭上嘅一把刀，仍未移除，繼續對佢構成心理威脅。至於控方控告曾蔭權其他罪狀，當然另行處理。
兩次審訊，兩次陪審團都有強烈意見分歧，猶如社會意見之縮影，一審之後，左丁山問過身邊親友嘅意見，認為曾蔭權有罪或無罪嘅，各佔一半，到呢次二審完畢，再問一次，幾乎個個都認為查無實據，政府應放過曾先生，唔好再精神迫害佢。現在律政司卒之有啲common sense，知道不能硬來，於是放棄要求三審。事實上，曾蔭權租住深圳東海花園一事，糾纏近五年，傳媒大篇報道，香港市民話唔知道有呢件事情嘅，可能係五年來獨居，不問世事，又或係天真無邪嘅宅男宅女。正常香港人一定對呢件事各有意見，各有偏見，亦分為反曾挺曾兩大類。如果真係有三審，都唔知點樣挑選到一個全無偏見，全不看報紙嘅陪審員。
陪審員點解不能達成一致意見，左丁山個人認為係租樓由業主支費裝修，根本係一般香港人嘅常識，要香港人認為接受業主裝修等同貪污，極難認同啫。幾十年來香港租樓，都係由業主事先裝修好，配備傢俬先至出租嘅，極少有爛屋一間租畀人，由租客負責裝修及維修之事，除非租金極便宜，遠低於市價。曾蔭權所租之深圳東海花園單位，以前係夜間娛樂場所，有女士陪客之地，後來關門大吉，業主必須自己出錢全面翻新大裝修先至可以搵到租客。香港人對買賣樓宇及租屋住最有經驗，若說公職人員租樓住而不能接受業主裝修，在香港係有乖常理，陪審員會憑法庭審訊資料判斷，都冇可能意見一致嘅喇。為避免香港進一步社會分裂，不利管治，林鄭月娥政府不妨放低呢類民間認為涉及「政治性質」嘅檢控，唔好再浪費律政司時間嚟追殺佢嘅前上司罪咯！