沙維同派路一周內齊齊宣佈掛靴，相信好多球迷都會感到難離難捨。當年，好多球迷都好鍾意攞佢兩個比較，到底邊個勁啲就真係唔同人有唔同意見，家陣再去比較亦冇意義，只可以話兩位都已經喺過去10幾年確立咗傳奇地位，所奪隊際榮譽亦可以互相媲美，各自各精彩。想討論係，沙維同派路之後，新生代又有冇中場可以接佢哋棒呢？唔計同樣已年過30嘅恩尼斯達同莫迪歷，可能大家即時諗到嘅，就係效力巴黎聖日耳門、曾被譽為兩人混合體嘅馬高華拉堤。
筆者認為華拉堤喺傳球同控制比賽節奏方面都做得唔錯，但就係爭少少壓場感同個人特色，尤其巴黎聖日耳門今季有咗尼馬同基利安麥巴比後，華拉堤嘅重要程度亦減低咗。沙維同派路一向唔係入球多嘅中場，華拉堤亦一樣，但前兩者都喺閱讀球賽能力極度出眾，經常送出一擊即中嘅傳送，華拉堤似乎就未有呢種咁精準或靈性嘅傳送技巧。
講到傳球嘅靈性同精準，今季喺曼城踢到曉飛嘅奇雲迪布尼可能仲利害，領隊哥迪奧拿將佢移後專責派牌後，更上一層樓。
不過，對迪布尼嚟講，佢嘅考驗係穩定性，前兩季都係表現比較飄忽，而且如果同沙維及派路相比，佢屬於侵略性更強嘅球員，入球能力絕對在兩人之上，但相比起兩位前輩嗰種在場上嘅優雅同唯美感，就唔係嗰種感覺；可能喺英超打滾關係，佢嘅傳球會更加講求速度。
保羅普巴、艾斯高、高基甚至比真歷等中場，近年亦備受外界讚賞，但亦都欠缺沙維同派路呢種「六號仔」嘅特質，當今球壇真係買少見少；其實，皇家馬德里今夏由貝迪斯簽入嘅丹尼施巴路斯，喺U21歐國盃時亦有接班嘅氣質，但今年21歲嘅佢仍有待磨練。