韋達返晒嚟！呢位過氣13屆香港冠軍騎師，繼剛周三（8日）晚谷草勝出呂健威馬房「軍歌」後，今午（11日）在沙田第四場四班1400米，以同馬主、隸屬葉楚航馬房的「軍炮」再下一城。四歲英國自購馬「軍炮」打開香港勝門，單Win及組合獨贏A2分別派51.5及21元。
韋達今場為「軍炮」開齋，用番剛戰贏「軍歌」的戰略，沿途在中後位置，末段一如「軍歌」般在內欄慳位殺上，盡顯個人走位機靈。
結果「軍炮」影相險勝後上如箭的落飛馬「八心之煌」一頭位開齋，韋達季內首次連勝兩個賽日，大打爭氣波！
近排韋達咁醒神，可能同佢下周三（15日）46歲牛一有關。佢連續兩次賽事為自己預祝生日，而呢次贏「軍炮」，亦係韋達個人新季首度攻下沙田賽事，可謂一炮雙響。
今場「八心之煌」影相飲恨做二奶，三、四名分別為「按得澄」及「駕迅」，四重彩派六萬一千幾。