雷神莫雷拉如果一期冇馬贏，或全日只贏得一場，都隨時俾人鬧到飛起，但43歲本港老將賴維銘，已食白果一個月，但就冇乜人理。梗係啦，冇期望自然就冇失望。
其實曾有「香港戴圖理」綽號的賴仔，今季都算係咁，贏咗「競駿時代」、「君子承諾」兩Win，表現仲好有活力，韋達咁大名氣，都係比賴仔多一場得三Win咋。
講到底，冇廐主支持嘅話，任你騎功再好都係枉然。下周三（15日）谷草夜賽，賴仔機會來喇，突然升呢做影子主帥，大倉葉楚航當晚出5駒，除了「勁快步」用巫顯東，其餘4隻「老友威威」、「睡德福」、「奇異晨曦」及「慷慨寶」竟全配賴仔。
或者大家會話，葉楚航咁做，即係反映今期佢手馬唔贏得，但角逐四班一哩嘅「慷慨寶」，上仗同程11檔，嘥力切入鬥搶，臨尾都仲頂得吓得第五，只輸兩馬位，喺四班絕非下風馬。今次「慷慨寶」如果抽個靚檔，賴仔同葉楚航隨時繼「君子承諾」後，又再合作取勝。