球迷們，知唔知道上一次冇意大利嘅世界盃決賽周係幾時？已經係1958年嘅事。呢支四屆世盃冠軍，正面臨60年以嚟再缺席世盃嘅危機，上周五歐洲區世盃附首回合賽事，作客瑞典0:1輸波。作客冇波入，加上中場馬高華拉堤喺次回合停賽，意大利周一返主場再鬥瑞典，可唔可以收復失地真係唔敢講。
伊巴看台做吉祥物
早幾日先收到前意大利國腳派路正式退役嘅消息，佢有份喺11年前幫意大利贏世盃冠軍，當時陣容仲算係星光熠熠，𠵱家就只得門將保方撐住。今時今日由教練雲杜拿領軍嘅意大利，星味大減，但論踢法似乎唔及瑞典咁有效率，中場同派路時代比點止低一個檔次，冇速度、反擊弱，前鋒恩莫比尼同比洛迪得唔到支援，意軍上半場只係得一次射門。
易邊後，瑞典喺61分鐘入波，前鋒托禾倫頭槌二傳畀積及祖漢臣，後者起腳省中意大利中場迪羅斯改變方向入網。意大利之後有達美安射門中柱，最終都係輸波收場。已經退出咗瑞典國家隊嘅曼聯前鋒伊巴謙莫域，都有嚟到朋友球場捧場。
04年歐國盃早有過節
雲杜拿賽後賴瑞典球員踢法粗野，邦路斯開賽冇耐就撞傷鼻，雲帥話：「其實我哋輸得好唔抵，保方基本上全場都唔需要做任何撲救，進攻上亦有入波機會，有一次中柱唔入。喺呢場咁重要嘅比賽，球證應該要做得再好啲。事實上意大利喺首回合確實應該表現得再好啲，但呢次係180分鐘嘅較量，任何嘢都仲有可能會發生。」馬高華拉堤喺今場28分鐘領黃牌，將會喺次回合停賽，雲杜拿喺下半場派出恩斯治尼入替佢，睇嚟已經着手為次回合佈陣做準備。
對意大利嚟講，瑞典真係有啲邪門。意軍喺1958年缺席世盃，當年決賽周主辦國就係瑞典，而兩隊最大過節，梗係2004年歐國盃分組賽嘅「默契波」事件，當年分組賽踢到煞科戰，意大利對保加利亞非勝不可，不過同組嘅瑞典同丹麥只要賽和2:2就肯定會雙雙出線，意大利贏100球都冇用，結果喺咁大嫌疑下，瑞丹真係賽和2:2，硬生生將意大利踢出局。