發行界強人強哥是有心人，閱本欄提及關夢南努力出版中學生、小學生文藝月刊，不怕這是蝕本生意，致電左丁山云：「關夢南嘅月刊發行，如要支援，我鼎力支持，一於唔收錢，聊表心意。」真係唔話得之至，於是向關夢南轉述，關兄話：「多謝晒，好感激強哥，不過搞咗幾年，已有相熟好拍檔，派發雜誌去學校，運作好暢順，而且成本低，唔想改動運作模式。之不過，我嘅問題唔係市場，其實我一人身兼多職，成本已好低，依家最想係擴大銷路，希望有多啲中小學為學生訂閱啫。我節流冇問題，開源最緊要！」
講得都有道理，適逢有位小學校長來電問左丁山如何接觸關夢南，大家不如上網啦，大概因經費所限，關夢南個學生文藝網頁，比較簡單一啲，但可以聯絡到佢嘅，網頁就係 http://hkpupilmagazine.wixsite.com/hkplmm （其實Google學生文藝就得）。
點解小學校長會搵左丁山傾學生文藝呢？問清楚，原來有苦衷。校長A話：「我間小學本來有啲名氣，升中成績唔錯，不少家長為子女申請入讀小一，我唔憂冇學生。但今年收到兩三間中學校長（勸喻）電郵，話我地升上中一嘅學生，中文成績唔夠理想，希望我地為小六生打好中文根基，唔好連累間中學，哎吔，死貓冇法子唔食嘅咯，呢兩三間中學又好似近年考DSE中文都唔多掂，英文考5*或5，中文就考3322，校監詐晒型，一啲中文考得唔好嘅，係來自我地小學；其實或者係佢哋教得唔好呢，關我地乜事。但如果因此而影響我啲小學生升中，咪好大件事。所以我要諗盡種種方法，提升本校學生中文寫作及閱讀能力，務求要佢地中英文水平上到中學之後唔駛俾中學批評呀！」
左丁山一代，讀書從來只怕英文肥佬，未試過會驚中文唔掂，點知時代變遷得快，中小學都話學生中文唔得掂，乜道理呀，唔通英國學生讀中學時，法文會叻過英文？無論如何，呢種情況造就咗不少中文補習先生，聽講名校學生補中文，市價係一千元一小時，又幾好搵喎，收入好過做小學校長。又唔怪得香港大學有幾個學系收生只計最佳六科成績，中文考到個3就掂，無非都係遷就學生嘅中文程度嘅啫！