37歲嘅前巴塞隆拿隊長沙維，喺卡塔爾球會艾薩德落班兩年後，周五宣佈今季結束後就會掛靴，繼派路之後，球壇兩大中場巨星一個禮拜內先後榮休，真係搞到大家好傷感。沙維曾經為巴塞攞過八屆西甲同四屆歐聯冠軍，見證巴塞由朗拿甸奴去到美斯甚至MSN時代，亦係「地上最強」嘅中場靈魂，同恩尼斯達合作無間，亦幫西班牙贏得兩屆歐國盃同一屆世界盃。佢解釋掛靴決定，係因為覺得自己老咗：「𠵱家比賽完都會覺得好攰，體力恢復慢咗好多，所以今季會係我最後一季。」仲話退休後會領教練牌，想直接轉做教練。卡塔爾仲有四場聯賽，12月7日就會舉行煞科戰，到時沙維就會正式告別。