港區全國人大代表將會換屆，今年底就會喺約2,000人組成嘅選舉會議，選出36個港區人大代表，前排有傳媒報道一份40人嘅港區人大代表「推薦名單」，政圈相信係出自西環，不過好多想參選、「繼承」父或母人大個位嘅第二代，都唔喺名單入面，包括港區人大常委范徐麗泰嘅仔范駿華。范太噚日講到個仔參選人大嘅事，講明唔想因佢係范徐麗泰個仔，所以受到特別好或者唔好嘅對待，難免令人猜測范太有乜弦外之音。
范太：唔想個仔受特別待遇
有政圈中人話，北京關注到唔少港區人大、政協只係掛個名，又或因為父母係愛國愛港人或香港大孖沙而獲推薦，做港區人大、政協後冇乜功績，所以一早要求新一屆港區人大、政協一定要有往績同戰鬥力，再加上料掌下任人大委員長栗戰書以務實嚴謹見稱，所以西環「推薦名單」冇晒班二代候選人完全唔出奇，反而反佔中時好出力嘅律師團，包括幫潮聯申請禁制令嘅陳曼琪就榜上有名。
其中唔喺名單入面嘅二代人選，包括做埋今屆唔做嘅港區人大常委范徐麗泰個仔范駿華，范太噚日被問到知唔知有份港區人大「推薦名單」，佢就話自己冇聽聞有份咁嘅名單，至於個仔選人大嘅問題，佢就話知個仔有意參選，但最好留畀佢自己講，范太又講到明，唔想因為佢係范徐麗泰個仔，所以受到特別好、又或者特別唔好對待，仲話最後邊個選到，應該交畀選委決定，政圈中人話范太咁講，難免令人猜測佢有乜弦外之音，例如係咪唔滿意有人事先玩篩選？但有中國特色嘅小圈子選舉，從來係由北京話事篩選，幾時真係有得畀選民自己揀？
李八方