特首林鄭月娥去咗越南出席亞太經合組織（APEC）領導人非正式會議，以往特首去APEC都會乘機同出席APEC嘅中共領導人見面，但有消息話今次國家主席習近平冇安排同林鄭單獨見面。
機場獲習握手
不過噚日習近平由北京飛抵越南峴港，林鄭就有去接機，鏡頭見到林鄭成功同習近平握手，仲傾咗一陣，似乎習近平對林鄭嘅態度就好過對梁振英。其後兩人出席亞太經合組織成員、東盟領導人非正式對話時再度碰面，林鄭月娥仲被安排坐喺習近平旁邊。
講番林鄭今次去越南開會，林鄭噚日就同越南總理阮春福會面，其實林鄭做政務司長時去越南訪問已見過阮兩次，林鄭話當年佢講過，希望今年7月退休之後，可以用遊客嘅身份再去越南玩，冇諗過竟然會用特首嘅身份再訪越，而阮春福話過去同香港合作協議都可以有效落實，希望日後越南同內地、香港嘅投資可以日益蓬勃。