由上個月底立會開始辯論政府一地兩檢議案開始，特區政府嘅高官就成日買嘢請傳媒食，相信都係諗住雞髀打人牙骹軟，呢個禮拜以嚟，由平民化蛋糕到高級西餅都有，噚日終於輪到政務司司長張建宗出手！噚日致謝議案辯論到一半，下午茶時段張建宗政助蕭嘉怡就突然同記者講，司長會請大家食嘢，之後就有人推一車豬頸肉、椰撻同埋蘿蔔糕出嚟。不過最好笑係蕭嘉怡介紹嘢食時話，第一味係「步步高陞」蘿蔔糕、第二味係「甜甜蜜蜜」椰撻。八方見佢講到呢度就停咗，問佢豬頸肉呢？佢諗咗陣話「飽肚嘅豬頸肉」，都幾有急才。話時話，小肥張都算有誠意，因為佢請嘅嘢食係官邸御廚煮嘅。