隔牆有耳：
立會首次　主席宣佈
楊岳橋議員12.8擺酒 - 李八方

一連三日嘅施政報告致謝議案辯論，都算係喺歡喜聲中完結，開心嘅除咗特首林鄭月娥過關之外，公民黨黨魁楊岳橋怕且係立法會史上第一位將婚訊載入會議紀錄嘅議員㖭。
話說噚日表決晒致謝議案後，主席梁君彥煞有介事叫各位留步，然後話公民黨郭榮鏗託佢代岳少宣佈，今年12月8日岳少會擺番場結婚酒會，想請各位議員出席。梁君彥講完都忍唔住補充吓，佢話「平靜之後有嘢去沖喜，大家都好開心」，岳少梗係笑到「紅都面晒」咁款。
散會後，財爺陳茂波都走去恭喜岳少。岳少話個酒會其實喺12.8嘅傍晚6點至8點，地點係立法會對面嘅中信大廈內一間餐廳，佢亦冇大鑼大鼓，只係請晒全體議員同傳媒箒！咁八方就再恭喜岳少啦。