出名鍾意喺立法會開會時點人數，結果玩謝唔少建制派議員嘅人民力量議員慢必陳志全，前日獲工聯會議員麥美娟主動示好，話若然慢必可以點少啲人數，就會請佢食「乖乖」。最終慢必前日同噚日嘅施政報告致謝動議辯論時，合共只點咗3次人數後，盛女娟噚日就履行承諾，搵人向慢必送上一個郵包，內藏一包乖乖。
慢必噚日喺立法會走廊攞住包乖乖，同記者分享呢段趣聞時，唔少記者都唔知乖乖究竟係乜。慢必就介紹，乖乖係一種佢小學年代不時食嘅零食，話可能因為麥美娟只係大佢一年，所以都識呢樣童年零食喎。問到會唔會真係「乖乖」唔再點人數時，慢必噚日就笑言：「我唔覺得點人數係曳曳囉！」