早前澳洲馬圈搞咗一場總獎金多到嘩嘩聲嘅珠峰大賽（1200米），結果吸引到唔少頂級澳洲短途賽駒嘅馬主，不惜使60萬澳元嘅報名費，都要角逐呢場高達1,000萬澳元（約6,000萬港元）嘅全球最高獎金草地賽。
最終除咗贏走冠軍嘅「紅達時」拎走榮譽同豐富嘅獎金之外，舉辦呢場天價賽事嘅新南威爾斯賽馬會亦名利雙收，唔單止終於有場賽事可以撼低競爭者維省賽馬會，當日投注額收益更破晒記錄，呢單嘢搞得咁成功，所以新南威爾斯賽馬會點會俾佢停。
佢哋早排就宣佈下屆珠峰大賽總獎金會加碼至1300萬澳元（約7,764萬港元），更逐年加碼100萬，預計2020年第四屆嘅總獎金會高達1500萬澳元（約8,958萬港元），然而留位報名費加價與否則未肯定，新南威爾斯賽馬會CEO話仲要同上屆買位者傾傾。
而新南威爾斯賽馬會亦同時公佈下屆珠峰大賽舉行日期，為2018年10月13日，地點仍係澳洲蘭域馬場，且看邊一匹短途馬屆時可以登上珠峰了！
圖片來源：蘭域馬場facebook