英格蘭U17周三喺落後兩球之下連追三球，以3:2反勝葡萄牙U17，英格蘭名宿謝拉特嘅16歲表弟卜比鄧肯射入今場比賽最後一球，係英格蘭U17可以反勝對手嘅英雄。
幼獅再次反吸對手
英格蘭U17上個月先至喺17歲以下世少盃決賽，落後0:2之下反勝西班牙5:2，第一次捧走U17世界盃。呢場決賽之後，幼獅喺星期三首次亮相比賽，結果以幾乎一樣嘅姿態反勝葡萄牙。
今場比賽，葡萄牙U17喺上半場已經領先2:0，不過幼獅換邊之後，由曼城嘅杜爾射入罰球，喺51分鐘追成1:2，而喺葡萄牙隊長安巴路整跌艾比亞兩黃一紅之後冇幾耐，艾比亞嘅傳球就令到對方球員擺烏龍，幼獅得以扳平2:2。到咗83分鐘，「謝四」表弟卜比鄧肯就接應艾比亞傳送近門建功，協助英格蘭U17反吸葡萄牙。值得一提係，雖然表哥謝拉特係利物浦名宿，但卜比鄧肯並唔係踢紅軍而係踢曼城。