白鴿黨議員尹兆堅喺荃灣福來邨嘅辦事處，噚日突然收到房署電話，話唔准佢喺辦公室內，近玻璃門位置張貼「我要真普選」海報。尹兆堅議辦人員即時打電話去房署抗議，房署職員就話，職員巡邏時影咗議辦相，之後經理同副經理睇過後，「只係呢個要移除」，又話唔係唔畀貼，但要移去室內地方，當議辦職員話海報一早已係喺室內時，房署職員就話玻璃門望入去望到都要移走。
阿尹就話現時冇打算移走「我要真普選」海報，因為基本法話明達致真普選係政府憲政責任，亦係一個完全合法的訴求，唔明點解算係違反租約？佢又質疑民建聯過去支持人大8．31決定、支持政府施政海報可以貼，點解「我要真普選」唔可以貼？