成日都話12星座，原來係有13星座㗎！坊間有說因為地球受月球引力牽引，已偏離咗3千年前巴比倫人用嚟建構占星學時嘅軸心，所以出現咗位於天蠍座同射手座以北嘅蛇夫座，而呢個星座日子喺11月29日至12月17日。
定居日本嘅法國藝術家Nicolas Buffe就以此背景創作展覽，話蛇夫座趕走咗一個星座，但唔係喺佢附近嘅天蠍座或射手座，而係最近聖誕節嘅山羊座。
展覽放置咗15呎高「火箭燈籠」，象徵希臘神繆斯坐火箭去宇宙搵山羊座。燈籠由日本椴木及落葉松木製作，利用淺草日本匠人傳統入榫工藝組合而成，呢個藝術裝置內可以睇到仲有山羊座嘅12星座，但如果透過火籠AR遊戲，配合手機Apps，抬頭見到嘅星空已經冇咗山羊座，透過呢個遊戲亦可以睇到蛇夫座喺天空嘅位置㖭。
如果想睇蛇夫座嘅代表圖案，展覽另一部份展示13幅Nicolas手繪星座圖同窗畫等。現場仲有蒙古包天文帳篷，投影天文同星象圖，室內都可以觀星。藝術展周六起至明年1月1日喺K11中庭展出。