行不改名，坐不改姓，點估得到，雙學三子之一嘅學聯前秘書長周永康會被改姓？出咗名對佛學有研究嘅周永康，前日成功保釋後，噚日出席電台訪問時，強調自己至今冇改姓。點解要特別就此作澄清？原來有傳媒懷疑將講笑當成真，報道佢跟隨釋迦牟尼改名「釋永康」，Alex真係唔知好嬲定好笑嘞，佢強調至今都係跟阿爸姓。
澄清仲係跟阿爸姓
睇番吖，《星島日報》噚日一篇〈周永康信佛改名釋永康〉嘅報道中話：「在獄中研讀佛學的周永康跟隨釋迦牟尼，改名釋永康，成為佛教徒。」據知唔少熟悉周永康嘅人，睇完都笑咗，連黃之鋒睇到之後，都喺facebook出post幫手澄清。
周永康喺商台節目中搞笑話：「我諗以後大家叫我『釋大師』，可能方便啲。」睇嚟都幾阿Q。佢話唔知道呢篇報道嘅消息來源，強調自己係有學佛，但至今冇改過姓噃，「我都係跟阿爸姓」，仲話早前有人戲言佢入獄，係去咗「釋迦牟尼樂園」（Buddhaland），指之鋒等人真係叫過佢做「佛康、釋永康」，「都係笑吓箒」，Alex再三重申係：「講吓笑。」