港隊越嚟越多入籍兵，以上場亞洲盃外圍賽贏馬來西亞為例，成隊波得葉鴻輝同黃威兩個係本港土生土長，其他九位全部係「入籍兵」，其實即係外援；小弟咁講可能已經得罪好多熱血球迷，但又唔可以掩蓋呢個事實，以及扼殺緊本土球員上位吸收經驗嘅機會。
「你咁講係歧視」，小弟唔肯定係咪，只係覺得足總應有限度吸納入籍兵，唔係一窩蜂咁見到有啱用就徵用。家陣世界都有好多國家用緊入籍兵，一線勁旅好似法國、比利時、西班牙、德國等都係，就用法國啲球員做例子，家陣嘅保羅普巴、基利安麥巴比、尼高路簡迪甚至當年幫法國贏得世盃嘅施丹、韋拉同迪西里等，全部都係非洲球員，邊係法國人？冇錯，冇呢班非洲球員，法國可能近幾年冇咁輝煌，但呢班人大部份細細個就舉家移民到法國，喺法甲球會接受青訓，代表國家隊係由青年軍開始踢起，而佢哋順理成章被當成係法國人。
相比下，港隊班入籍兵係兩回事，好似西班牙嘅迪亞高哥斯達（圖）同意大利嘅艾達馬田斯，佢哋係巴西人，因為喺西甲或意甲混得耐，而巴西國家隊又冇召喚佢哋，攞完別國護照就被歸化，但呢啲例子始終唔係多數，亦唔會影響當地球員上位機會。
另一個問題就係當外援勢力喺國家隊逐漸坐大，內訌機會亦大增。法國同荷蘭，都曾經有黑人白人之間分黨分派，甚至大賽期間亦出現過兵變，但當然唔可以完全賴晒呢個原因，你見德國隊內都有好多來自唔同地方嘅球員，但仍然好講紀律，有時教練係咩人都好重要。
文：盧卡東尼