新一屆特區政府上任至今超過3個月後，一班政治助理噚日就喺立法會辯論施政報告致謝動議期間現身立法會，原來係想認識吓傳媒平日喺立法會嘅工作。
其中曾喺商台新聞部任職嘅財政司司長政助何翠萍，除咗喺立法會走廊歷代主席相前、影相「打卡」留念，仲喺咪兜旁問傳媒扑咪位喺邊，似乎過去真係好少到訪立法會；而陳茂波噚日請記者食COVA西餅，亦係由何翠萍代勞送上，而陳茂波就話好滿意對方表現，話等佢返工「等到頸都長埋」。
財經事務及庫務局政助楊寶蓮、創新及科技局政助張曼莉、商務及經濟發展局政助馮海容、政務司司長政助蕭嘉怡、運房局政助符傳富、發展局政助馮英倫，則喺上屆已做政助嘅保安局劉富生帶隊下，參觀平日攝影室，之後喺立法會走廊四出搵議員同傳媒傾偈。