上星期四故意搵路行，一個人走去FCC食午飯，本來最快途徑係自大道中轉上雲咸街，過咗安慶台不遠就有一條長樓梯行上雪廠街，FCC就在旁邊。但上斜路上長樓梯，並非適宜，於是選擇行比較平坦之路，就係在閣麟街之行人電梯上到荷李活道，再落番地面行去雪廠街，當然更花時間啦，但步行對健康有益吖嘛。食完嘞，又自雪廠街過雲咸街去荷李活道向西行，只見交通擠塞，汽車寸步難行，左丁山行呀行呀，一直行到去文武廟，過埋樂古道，由東街轉落去大道中，沿途只見汽車蟻行，有兩架救護車，相隔兩條街在路上，猛咁響起嗚嗚嗚，但冇乜用吖，所有車唔郁得，如以干諾道中比喻，就係車龍由怡和大廈排到去信德中心，荷李活道之塞車，由大道中打困籠塞番上嚟，實在難搞。
FCC對面以前有間小型港中醫院，屬聖公會物業，後來聖公會計劃重建整個地段，不與港中醫院續租，醫院關門大吉，當時知道港中醫院（唯一專門為女士合法墮胎嘅醫院）有啲唔順氣，但聖公會一於唔睬，好嘞，眨吓眼過咗幾年，間醫院荒廢晒，最近有消息話聖公會想拆建港中醫院，改為二十幾層新型醫院，自己經營。想法幾唔錯噃，但立即有保育人士反對，反對理由之一就係地點交通難以疏導。呢個理由珍珠都冇咁真，好似十一月二日星期四中午咁，從港島西面（譬如半山區）去呢間「新醫院」，都唔知要塞車塞幾耐。救護車行荷李活道嘅話，隨時錯過救人「黃金時間」，聖公會根本無能力疏導會督府外嘅交通。
起醫院都要揀Loaction，Location，Location，一位老友最近去一間新醫院驗身，叫做「港怡醫院」，位於南風徑，佢坐的士去，司機唔識行，要睇Google Map，但去到之後，哦，原來咁簡單，就在往灣仔香港仔隧道入口下面，望過去就係壽臣山村，隔籬係港大同學會學校，再行遠啲（約七分鐘）就係地鐵車站，故此呢間醫院對外交通十分方便，唔怕塞車。南區居民往來呢間港怡醫院包唔會有阻滯，未來幾年，好可能成為壽山村及南區富裕／中產階級之御用醫院，因為出香港仔隧道去養和都會塞車也。新醫院地方大，大堂似酒店lobby，目前應該係全港最美麗的醫院，問老友去港怡醫院做乜，佢笑騎騎咁講：「趁未有人唱好之前搶先嚟檢查身體，一年後怕要排隊好耐先至有位呀！」