今晚（8日）谷草跑出的頭馬越開越冷，繼頭兩場分別由10倍「搖錢樹」及35倍「海之濤」勝出後，第三場四班1200米賽果更冷，高伯新馬房「天皇巨星」在華人騎師楊明綸胯下，勁爆54倍冷Win開齋，組合獨贏A3派50.5元。
由香港足球會團體持有的「天皇巨星」現年四歲，上季出道以來，原本最叻只於泥地短途兩度入Q，今晚賽前季內跑了三場，最叻第八名，但今場用新配搭楊明綸出戰谷草1200米，卻像變了另一駒，孭住114磅從第2檔出閘，沿欄前置，臨尾透出贏一馬位開齋，亦造就楊明綸連勝第四次賽事。
楊明綸同時季內初次為高伯新建功，而高伯新新季增至有六場頭馬。
高伯新謂對「天皇巨星」爆冷取勝感到非常意外驚喜，他說可能由於剛與前英格蘭一代中鋒舒利亞合照，帶給自己好運有關。高伯新透露他在英國住在紐卡素，與舒利亞的家只距20分鐘車程，可謂和舒利亞十分有緣。
英超名宿舒利亞近日訪港，以便明晚（9日）出席私人組織籌款活動。這晚佢到快活谷睇跑馬，不過今場香港足球會團體就冇搵埋佢拉頭馬，否則都會幾有話題性。
第三場二、三名「印印腳」及「全勝姿態」都是熱門，第四名則由冷馬「瀟洒兄弟」取得，四重彩派24萬幾。