西甲開季至今已經踢到第11輪，皇家馬德里球星基斯坦奴朗拿度（C朗）因季前西超盃首回合推撞球證，被罰停賽而缺席咗頭四輪聯賽，但復出後踢咗七輪都只係入得一球咁大把，同過去幾季判若兩人。長陷入球荒，班隊友似乎都有微言；據西班牙傳媒報道，一向心高氣傲嘅C朗未有認輸，周日主場大勝拉斯彭馬斯3:0場聯賽後，佢即刻喺更衣室同隊友鬥氣對賭，話自己季尾一定會重奪西甲金靴獎。
據講事緣係對拉斯彭馬斯場波，C朗由右路傳中助攻畀艾斯高入波，但對方冇意第一時間去搵佢慶祝，或指住佢嚟多謝，令到一向自我感覺良好嘅C朗覺得冇被尊重，好唔開心，後嚟艾斯高同隊友都意識到，先至走去氹番佢，但黑緊面嘅C朗都係擊吓掌算，繼續冇笑容；之後返到更衣室究竟發生咩事就冇人知，淨係傳出話呢位新出爐嘅世界足球先生，同至少兩個隊友對賭，賭自己仍會成為今季嘅西甲神射手，但如果輸咗，賭本唔係落入隊友度，而係捐去慈善機構，而究竟賭幾大，就冇人知喇。
落後美斯11球仍成次熱
C朗對上一次做神射手已經係2014/15球季，當時入咗48球，繼後兩季就逐漸減少，2015/16球季入咗35球，上季就入得25球，分別輸咗畀巴塞隆拿嘅蘇亞雷斯同死敵美斯。嚟到今季，美斯已經入咗12球，C朗就大幅落後，唔怪得外國啲博彩公司，例如Bet365、Skybets等，美斯攞神射手嘅賠率都已經熱到去1.06倍（見附表）。不過，講番轉頭，雖然C朗入得一球，佢哋都唔敢睇小呢位球王，即使同美斯有成11球差距，莊家仍然將佢列作次熱，賠率有16倍；反而家陣喺射手榜排第二、入咗九球嘅施蒙尼沙薩只係第三熱門，賠率已經冷到成40倍。皇馬家陣喺西甲入最多波嘅係艾斯高同馬高阿辛斯奧，都係入四球。