繼保連奴、艾里奧、高梵等人，到今年西班牙三子佐迪（圖）、列斯奧同埋丹尼，亦都加入咗港隊成為入籍兵。球迷或者會問，呢班入籍兵會唔會阻礙土炮發圍，「搞到啲香港後生仔冇得上位」。但筆者想講嘅就係，「着得起件波衫就係自己人」，而且香港係多元社會，試問點解唔可以用入籍兵呢。
以佐迪為例，雖然佢今年已經36歲，跑得又冇以前咁快，但入選咗港隊之後就兩場入兩球，表現絕對收貨。至於土炮方面，港隊入面仲有陳俊樂、謝家榮同埋鄭展龍呢班後生仔，佢哋嘅活力可以彌補入籍兵嘅不足，而佢哋本身又可以喺入籍兵身上攞經驗。
其實德國、美國都一樣有重用外籍兵。德軍嘅高路斯同埋普多斯基都有波蘭血統，而奧斯爾、安利簡恩同埋根度簡都有土耳其血統，佢哋全部都係國家隊嘅一分子，奧斯爾仲幫德國攞埋世盃冠軍。美國前鋒艾朗祖漢臣同埋艾迪杜里就分別有冰島同埋海地血統。
可能有球迷會話，奧斯爾、安利簡恩呢啲由細到大都喺德國住，接受當地球會訓練，基本上同土生土長嘅德國人無異。反而佐迪、列斯奧係突然「殺出」，加上喺本國得唔到機會先嚟香港踢波，「質素一定冇咁好啦」。事實上佐迪、列斯奧同埋丹尼至少喺香港踢咗七年波，已經熟晒本土文化同埋香港足球踢法，一嚟就可以即食。
港隊入籍兵當然唔可以同奧斯爾呢啲球星相提並論，但其實入籍兵有晒身份證，絕對係真．香港人，佢哋嘅經驗又可以幫到港隊嘅年輕球員，絕對可重用！
文：聰鳴