韋斯咸噚日正式聘請莫耶斯出任領隊，接替啱啱禮拜二畀人炒魷魚嘅前主帥比歷，到底真係咁信任「莫天才」，還是太睇唔開呀？
54歲嘅「莫天才」曾執教過愛華頓、曼聯同埋新特蘭。喺佢愛華頓領軍嘅11年深受外界讚賞，所以喺2013年，退休嘅紅魔領隊費格遜欽點佢做接班人入魔，號稱「被選中的人」，點知紅魔喺2013/14球季錄得英超有史以嚟最差成績嘅第七位，而佢喺球季未完結就畀人炒魷，由傑斯臨時接替。佢之後曾遠赴西甲執教皇家蘇斯達，但都唔太成功，回流英超之後入主新特蘭，點知又搞到黑貓上季降班，再次無得撈。之後盛傳莫耶斯將會擔任蘇格蘭國家隊主帥一職，帶領球隊爭取打入2020年歐國盃決賽周，最終佢落班槌仔幫。
槌仔幫𠵱家沉咗喺英超降班區排18位，上星期喺主場俾利物浦炒1:4。莫耶斯接任之後咁講：「我哋需要球迷支持。只要一條心，季尾就會有好成績。」
執教至今季完結
根據《BBC》報道，莫耶斯稍後時間正式參加球會首課操練，而且聽講曾效力槌仔幫嘅前英格蘭U21主帥皮雅斯，都會加入莫耶斯嘅教練團隊。據英媒話，莫天才將會教到今季完結，護級成功就有200萬鎊（約2,000萬港元）獎金，而且會簽多兩年㖭！
