【我老公係發哥連載系列7之婚後生活】周潤發有民間特首之稱，每個接觸過發哥的粉絲都讚他沒架子又親民，說話風趣幽默。到底發哥私底下是否還有另一面呢？今回訪問發嫂內容，重點是他們婚後的生活。
對於發哥私底下有沒有另一面？發嫂說：「基本上都唔係有好大分別，佢係好錫老婆、家人，包括我家、佢個家！」發嫂又讚發哥為人細心：「佢知我鍾意食蟹，就自己去街市買咗兩隻蟹畀我，蒸埋喎！佢間唔中都會畀我驚喜！每年我生日，佢提前一晚會買定禮物，有時塞喺枕頭入面，又或者一揭開被成床係花！都幾浪漫㗎！」
性格好急
情人眼裏出西施，但發哥有何缺點？發嫂想了想笑說：「好性急囉！話做就要做。佢係急到例如約咗人7點喺尖沙嘴食飯，佢6點半未夠已經stand by，着好鞋，將部車開喺門口。」
發嫂還說發哥在家中很靜，話不多說，經常躲在攝影房上網幾個小時不出來：「演員好需要有自己空間，佢喺攝影房，我好少去打擾佢，但我係最怕佢入廚房，佢煮完一餐飯，廚房就好似打咗場風咁，亂晒！」
行山放鬆
兩個人住過萬呎大屋，但發哥少說話，問發嫂會否感到寂寞？發嫂搖頭說：「我唔會悶喎！因為有好多嘢搞，要搞佢啲合約，要做自己嘅投資，仲有屋大要打理，我希望佢專注做演員，有事就我來頂，等佢可以得閒去影吓相、行山同跑步放鬆吓，做佢想做嘅嘢。」
採訪：陳月媚、倩宜
攝影：郭賢興、陳順禎
協力：林德雄
化妝：Fiona To
髮型：Byron Ho、Louis
場地提供：香港嘉里酒店