話咁快就嚟年尾，又係競投年宵市場攤位嘅日子喇！今年各大政黨一如以往競投維園嘅年宵攤位，點知一向投開6號攤位嘅社民連竟然遇到阿姐疑似托價，主席吳文遠惟有用「777」呢個今年特首選舉後，因林鄭而被賦予新意思嘅數字，嚇走競爭者，仲贏得全場掌聲㖭。
吳文遠話今年年宵攤位嘅成交價普遍較低，原本以為用萬零蚊就投到攤位，但遇到阿姐疑似托價，當叫價去到兩萬幾時，佢一度以「2萬9千689」打算嚇走阿姐，點知阿姐唔怕「689」，仲一托就托到3萬。吳文遠最後以3萬零777元投得攤位，大呻成本較預期高！佢話今年年宵除咗會繼續諷刺林鄭小恩小惠嘅施政方針，更會呼籲大家支持政治犯，指社民連有多人面對訴訟，叫大家踴躍捐輸。
至於每年都會競投維園年宵1、2號攤位嘅支聯會，今年就以33,100元投得兩個攤位，比上年慳咗18,500元。據知支聯會年宵檔貨品同劉曉波、劉霞及民主女神像有關。