美食車以後唔只係賣美食咁簡單，仲可以幫手機叉埋電㖭！八珍醬園美食車加入咗環保節能設備，將太陽能板裝喺車頂，生產出嚟嘅電就會供車內風扇同車身嘅充電設備，呢架仲係全港首部環保美食車，獲得中電環保節能機構嘉許計劃中「傳統美食組別金獎」。
八珍醬園第三代負責人伍尚鈞Trevor同八方講，其實成架美食車設計都附有環保概念，例如一開始特登揀架慳油啲嘅車，今次仲添置太陽能板同中電智能管理系統，利用手機App就可以實時監察用電量，作出適當嘅資源分配同營運模式。佢仲話新裝置成本約3萬元，比一般美食車仲慳電25%。
問到佢睇完啲用電數據，有冇得着？佢話見仲有剩電就即刻諗到推出慢煮牛腩，咁遊客咪有多個美食選擇囉！