科技行業挖角係家常便飯，只要喺行頭闖出名堂，跳糟話咁易。講緊美圖（1357）新請嘅首席運營官程昱，就係微博前副總裁，喺微博做咗大約5年。
程昱之前喺微博負責商業化體系，包括廣告、會員服務、電商、互聯網金融、移動支付、直播和移動增值服務等，同時負責探索創新商業模式。今年3月先出嚟介紹微博成立的網紅電商平台，轉個頭已經投身美圖。
讀電腦吃香，程昱揸住美國阿克倫大學計算機碩士學位，一路都係科技公司跳嚟跳去，曾在微軟公司和奇虎360科技擔任產品開發和工程項目管理工作。
美圖創辦人兼首席執行官吳欣鴻話，相信程昱可靈活運用經驗於美圖嘅商業化戰略。首席運營官呢個位似乎係新設立，年報同招股書都搵唔到，唔知係咪特登為挖佢過檔而開嘅呢？