香港福建幫有三劍俠，楊孫西、施子清同啱啱有份買咗中環中心嘅盧文端，佢哋3個friend過打band，各自嘅公子都喺政壇打滾，其中盧文端囝囝盧金榮（Wingco）剛卸任菁英會主席，仲有唔少公職在身，亦幫忙打理家族生意，但Wingco細個志願唔係做生意，愛發夢嘅佢諗過做科學家，最愛拆開電子產品再裝嵌。
最愛拆電子產品再裝嵌
44歲嘅Wingco話自細好聽教，讀書成績就一般，「我唔鍾意死記，對文字冇乜興趣，對數字就較敏感」，難怪鍾意嘅科目係數學同物理。佢自言對器械極感興趣，愛將啲電子器材拆散晒，然後再裝嵌，「有時好奇怪，點解識得發光？識得發熱？咪拆嚟睇吓，發現『原來係咁……』」，佢同時愛幻想，會想像一個科幻世界係點樣。
返回現實，瘦蜢蜢嘅佢原來係運動愛好者，長跑、跳高、擲標槍同划艇等乜都啱，雖然唔係成績出眾，卻係為興趣，「我好鍾意有關速度嘅活動」，18歲考車牌，20歲考電單車牌，其後考埋貨車甚至拖車牌。拖車？「係呀，拖走壞車嗰啲，我乜車都鍾意學，可能因為機械。」
香港婦女會中學讀到中四就到美國升學，開始為前途而發憤，美國南加州大學計算機學系學士同碩士畢業後，趁美國科網熱喺當地同朋友創業開軟件公司，2000年撞正科網股爆破生意轉差，自覺營商知識同經驗不足，結果喺南加州大學讀埋工商管理博士，之後先返港打理家族生意。佢同太太都係喺美國一個婚宴結緣，Wingco畢業無耐都返港同太太重聚，2005年結婚，育有分別11歲同9歲嘅囡囡。