皇家馬德里禮拜日西甲主場以3:0大炒尾二弱旅拉斯彭馬斯，各項賽事嘅兩連敗告終，不過王牌球星基斯坦奴朗拿度（C朗）又食白果，佢個人喺西甲嘅入球荒已經延續到三場，而且佢今季聯賽踢七場只入得一球，所以話皇馬戰績上雖然反彈，不過睇嚟仲係唔多樂觀！
好在仲有阿辛斯奧
皇馬上個禮拜喺西甲1:2輸畀「升班馬」基羅納，仲要反勝為敗已經夠晒樣衰，然後再喺歐聯分組賽作客又以1:3輸埋畀熱刺，成績真係失禮，到禮拜日返西甲，呢場喺完全控制戰局下拎番三分。今場比賽，皇馬喺41分鐘先由卡斯米路頭槌建功，上半場對住今季作客基本上完全投降嘅拉斯彭馬斯，都只係領先1:0。
好彩，皇馬下半場有新星馬高阿辛斯奧喺56分鐘遠射得手，將紀錄改寫成2:0，到74分鐘，艾斯高接應C朗嘅傳送幫皇馬埋齋，協助球隊贏番場3:0。而阿辛斯奧同埋艾斯高，就各自以四個入球並列為皇馬今季聯賽神射手，「BBC」組合影都冇，當中C朗繼續喺西甲只入一球，而一路養傷嘅加里夫巴利都有兩粒，賓施馬今場又炒單刀，所以入波仲係停留喺一球，呢個前法國國腳仲畀主場球迷柴台㖭！
不過，卡斯米路就幫C朗同賓施馬兩個大哥講好說話：「對我嚟講，C朗全場製造咗好多威脅，佢值得有番入球，我相信佢未來都會不斷入波，我完全冇質疑過呢樣嘢。賓施馬就係世上最好嘅9號仔之一，佢踢得非常好，都係嗰句，入波遲早會嚟。」
落後榜首巴塞八分
踢埋呢周之後，皇馬以11戰得23分排喺西甲第三位，仲落後緊喺上周六主場以2:1贏西維爾嘅榜首巴塞隆拿八分，連第二位嘅華倫西亞都領先緊皇馬四分，衞冕形勢梗係麻麻地啦！卡斯米路就話唔擔心：「踢皇馬壓力點都大，不過聯賽仲有排踢，巴塞之後一定會輸波嘅！」至於拉斯彭馬斯就以11戰得六分，繼續留喺尾二。
