遭中央DQ冇得做特首嘅全國政協副主席梁振英，噚日出席有數百人在場嘅論壇時，全程語不驚人誓不休。佢提出一個最驚嚇嘅觀點，真係以「名」論人，就係單憑你個名，就認定你係咪愛國？而以佢嘅邏輯，「梁振英」就完全唔愛國咯！
說明對民族復興嘅冀盼
梁振英話喎，其實大多數香港人都係愛國，點解佢咁講？原來佢出席之前睇過現場人士嘅名字，發覺唔少人都有個「國」或者「華」字，係對民族復興有冀昐：「我睇咗嚟報名參加今日論壇嘅朋友嘅姓名，喺大家嘅大名裏面，至少有50位個名裏面，有個『國』字，或者有個『華』字，說明我哋香港人內心對國家、對國家發展、對民族復興嘅冀盼。」嘩，用個名論斷一個人係咪愛國，真係創意無限。
聰明嘅網民，即時拋下一個問題，究竟「振英」二字，大家又點睇？唔通係「振興英國」咁大逆不道？其實由佢講來，係咪太有喜感先？連西環契女、經民聯立法會議員梁美芬，都被網民質疑佢個名有「美」字，係咪代表咗美國？明明係又紅又左，偏偏又英又美，好諷刺吓喎！
八方就替社民連梁國雄不值嘞，原來長毛喺梁振英心目中，都係愛我中華嘅一員，在任特首時又點解要殘害忠良呢？曾俊華都有個「華」字喎，但佢就不能獲得黨嘅照顧嘞。
識睇睇留言
Paul Lau：如果名字裡有（民）字的豈不是愛國民黨？
Joe Kok：咁「振」字？振興大英帝國，「英」字？即係懷念英國統治香港時期囉！
May Law：你班刷鞋仔講到英國咁有陰謀，自己D仔女就送去英國讀書，點解唔去北京－清華呢？有個『華』字架
陳大文：叫振英即係賣國賊
Jack Law：國、華？當然指中華民國啦！Ｘ，呢個振興英國嘅689賊，又走出嚟發噏風！
Caesar Wong：有名叫唔係振華係振英，佢重送仔女去英國讀書都唔番共匪國讀，正式勾結英國……
資料來源：《蘋果》網頁
李八方