「最重要是冷靜應對」、「虛心聆聽別人的意見」……今年政務主任（AO）招聘，公務員事務局邀請11名AO分享工作和面試心得，有用與否見人見智，但冷靜和虛心確實是AO面試的重要條件，因為要提防考官「為難」，亦即「陰你」，「陰你係好正常 ，如果佢越刁難你，即係你越有機會」，前AO盧志明（盧Sir）說。
記者 王家文
新一輪AO招聘約1.7萬人爭逐45個空缺，若成功通過12月2日舉行的聯合招聘考試（JRE），便有機會進入明年2月舉行的面試。「筆試有時間準備、組織，但面試要考官講完，幾秒就答，難度高好多」，青協生活學院AO投考工作坊課程導師盧Sir說，每場面試所需的技巧和應對能力，都各有不同。
首輪面試--歷時約20分鐘，設2至3位評審，考生需先就一個題目發表3分鐘講話，評審小組會就考生的講話或其他題目提問，供考生作答。
盧Sir：面試題目與筆試大同小異，但要即席作答，要求更高。「如果考官為難你，其實考慮緊你係咪適合」。例如刻意抬高考生，「你條件唔錯，自己出去發展都得，點解要嚟考？」又或明踩考生，「其實你冇乜機會，不如早啲返去啦」。
AO是各司局級官員的左右手，需面對群眾和傳媒，冷靜頭腦和抗壓能力不可或缺，考官的挑釁其實是測試考生的應對能力和情緒智商（EQ），「所以千祈唔好腳軟、騰雞，唔好失落、發脾氣，平常心面對，照答問題，處變不驚」。
小組討論--屬最後面試階段，考生以約6人為一組，一般每小組會討論3個項目，每個項目包含兩項任務，每個任務為時20分鐘，考生需輪流擔任小組主席。
盧Sir：小組討論分組員和主持兩個角色，當組員時，對其他人的意見無論贊成與否，都要闡述理據，「只話認同，唔講原因，係冇意思，只係廢話」。換轉主持會議，則要顯示組織能力，引導小組成員提出有效建議，完成任務，「睇你有冇領袖才能，可唔可以包容其他人」。
但很多時候考生會混淆身份，「唔記得自己做組員定主持，因為兩個角色有唔同要求」；又或在討論過程中急於突出自己，甚至挑起爭端，互插對方，「如果咁做就好易失控」。
個人面試--完成小組討論後，每名考生將進行個人面試，有5位評審員，過程約20分鐘。
盧Sir：通常其中一名評審員是司局級的部門主管，「親自落場揀卒」，但不代表「坐定粒六」，「大約三個只有一個成功」。考題多數是政策及時事，跟之前的筆試和面試相若，只是最後一輪，要在「老闆」面前表現自己的能力。
若在最後面試時能認出部門主管，不妨跟對方打招呼，顯示誠意，「有做足準備功夫」。現時政府網站已列出各部門資料，「如果過咗筆試同第一關面試，唔該準備一下，熟讀所有政府部門，起碼知道個主管叫陳大文定張小明，同埋佢講過乜嘢說話」。
無論筆試或面試，盧Sir認為，都必須有充足準備，包括心態，「去考得呢個試，就要跟從呢個遊戲規則，認同政府呢個持份者嘅立場，起碼考試時要認同，如果唔係，你一定考唔到」。