里昂中場費基亞喺周日法甲里昂作客5:0大勝聖伊天嘅比賽，模仿美斯除衫慶祝入波，差啲搞到騷亂！費基亞喺84分鐘射入個人今場第二球，幫里昂埋齋，佢走埋去看台前面，學美斯除衫向主場球迷展示球衣慶祝。唔同嘅係，美斯咁做就冇事，但係費基亞就爭啲畀人圍。雖然球證快快手向佢出示黃牌，但都平息唔到球迷嘅怒火。有啲球迷更加嘗試衝落嚟想狙擊佢，費基亞最後要由保安護送離場，現場仲出動埋防暴警察（圖），球賽被逼暫停成30分鐘先可以繼續。差啲搞出大頭佛，費基亞賽後表示唔後悔咁做：「我咁做並冇惡意，其實佢哋唔使咁激動，我唔後悔做咗呢個慶祝動作。」