一直只聞樓梯響嘅新田購物城，相信就快「望見家鄉」喇！身為搞手嘅民建聯黃定光（象哥）噚日同傳媒擦蟹，席間講番呢兩年搞購物城嘅血淚史，總之佢講明今年聖誕會試業、農曆年正式開幕，家陣連屋宇署嘅入伙紙都拎埋喇！
象哥話購物城呢單嘢由2015年4月開始籌辦，冇乜相關經驗嘅佢形容，呢次係摸住石頭過河，初初仲以為好快搞得掂，點知做落先知，一共要招呼17個部門咁多，全部要符合要求先得。租戶方面，計落出租率都有六成，嚟緊兩周搞埋啲租約。有人擔心塊地只係獲臨時批到明年9月15日，象哥話明年3月會再申請，亦有信心會再獲批，話晒成壇嘢揼咗成1億幾落去，唔會只係做幾個月啦。