香港前冠軍騎師潘頓，本周三（8日）起停賽兩期。報名角逐周三快活谷二班1200米，力求季內四連捷的「紅星」將由潘頓換上史卓豐。不過就算潘頓不停賽，亦會喪失帥印，因為「紅星」只負114磅，潘頓冇可能造到磅。
相信潘頓真正肉赤的，是冇得騎「紅星」的廐侶，即葉楚航馬房另一新勝馬，報爭三班1200米第二組的「心慷慨」，這匹4歲美國自購新馬上季成熟未足，只得2亞2季而未勝，但隔了一個暑假後進步神速，上仗季內初出，熱到1.8倍飛到馬到開齋。「心慷慨」目前才4歲仍有排贏，今次升上三班負119磅，潘頓亦勉強造得到，但奈何他停賽，只能做觀眾。
咁「心慷慨」會換邊個呢？據知將初配華將梁家俊。今季葉楚航與梁家俊，於谷草只合作過一次，即憑「可愛寶」取勝，珠玉在前，加上潘頓稍後復出，隨時攞番「心慷慨」來騎，家俊仔同「心慷慨」分分鐘只是一次性合作，唔騎到你盡就奇咯！