上個禮拜六德甲上演榜首大戰，得到名帥希歷基斯回巢嘅拜仁慕尼黑，作客以3:1輕鬆擊退多蒙特。拜仁聯賽攞到四連勝，仲領先早場反勝漢諾威2:1嘅RB萊比錫四分。反觀多仔則繼續頹勢，唔單止歐聯就嚟出局，而聯賽仲連續四場不勝。
拜仁上半場17分鐘已經由洛賓妙射開紀錄，42分鐘仲擴大比數，甘美治右路傳地波入禁區，羅拔利雲度夫斯基後腳射門，省中祖利安韋高後笠死路文貝基，領先至2:0完半場。
換邊後多仔一度搶攻，但始終無法攻破拜仁，更喺67分鐘再失一球。阿拉巴左路傳中，倒戈嘅羅拔利雲度夫斯基楔前柱疑似踢中個波，而後柱嘅占士洛迪古斯衝前想執雞，最尾個波入網，拜仁遙遙領先至3:0，而德甲賽會最終將入球歸畀阿拉巴。落後三球嘅多仔最後由後衞馬斯巴查破蛋，將比數追至1:3完場。
今仗射入一球嘅洛賓好鬼威水，佢以93個聯賽入球成為拜仁史上入波最多嘅外國球員。而教練希歷基斯返嚟拜仁後，連埋德盃射12碼淘汰萊比錫，拜仁累積七場贏晒！