唔知由幾時開始，好鍾意用「漆黑中的螢火蟲」呢句說話。騰訊（700）有份投資嘅內地網上汽車零售交易平台易鑫（2858）噚日記招，竟然就有隻「漆黑中的螢火蟲」嘞，講緊嘅係公司首席財務官劉曉鉦。
嗱，易鑫點都算係新經濟股，管理層主持記招，當然唔係西裝套裝咁老土，三位管理層齊着印有公司logo嘅黑色裇衫，女掌櫃樣子清秀，簡單一件黑色裇衫已經輕易搶鏡。
劉曉鉦今年40歲，今年4月加入易鑫前，喺奇虎360科技做首席戰略官，之前做過瑞士信貸（香港）中國科技投行部主管、花旗亞洲中國投行部副總裁，呢份履歷都夠省鏡，公司上市後靠佢應付芬佬，肯定無問題喇。