冠軍騎師雷神莫雷拉今季雖然有些跌watt，但在練馬師們心目中，雷神的神級騎師地位，仍然不可動搖。尤其是一些其他騎師搏輸的馬，如果雷神say yes肯接手，相信練馬師十之八九都會乖乖奉上帥印。
就如已報爭下周三晚（8日）快活谷四班一哩，呂健威馬房的「塑料喜」，上仗於同班同程配史卓豐，成為4倍熱門，直路透出後臨尾一步遭「華美之寶」擒下，唔失望就假。之後呂健威亦有所安排，已將「塑料喜」交由雷神接手快跳兩課，無論是雷神索騎或廐主主動邀請效力，此駒今仗將首次由雷神出賽，看來是難以避免。
5歲的「塑料喜」身價700萬，是2015年香港國際馬匹拍賣會最貴成交價馬，暫時只贏過一場，累積獎金僅156萬左右，有排未回本，幕後梗不會留手啦。再睇雷神、呂健威今季只合作過三次，得兩冠一殿佳績，看得出如果是無取勝機會的呂廐馬，雷神根本不會沾手，更可反映「塑料喜」今仗應大有可為。