呢日有速遞公司送嚟一袋重物，打開一睇，原來係八本新書，作者名不見經傳，左丁山全部唔識，但出版社係三聯噃，三聯肯咁提拔新人，為不知名作家出新書？呢八本書就係：（一）天空膠雨，作者馮捲雪，（二）尋我（漫畫小說），作者阿宅和菱形；（三）香港舊書店地圖，作者黃曉南，（四）圈子，作者紅牙，（五）東京。夢。生活。作者陸沛靈，（六）書信日和，作者容靜水，（七）正確的錯誤，作者木可，（八）儲物櫃，作者鄭植，八本書中，有小說，有掌故，有漫畫，編輯及印刷都算好細心，以新進作者而言，幾難得到出版社咁好招呼嘅咯。
環保袋內又有一張卡，上有新鴻基地產公關大哥廖國偉寫嘅：「由新鴻基地產新閱全力策動，與香港三聯書店合辦的第六屆『年輕作家創作比賽』於早前圓滿結束，成功扶助九位年輕作家出版首部著作，成就出書夢。謹此送上一套共八本優勝作品，希惠存。」
咁就清楚嘞，原來呢八本書係比賽作品之中，脫穎而出嘅，而今年輕人寫稿有心，投稿不易，做文藝青年，竟然比上世紀六七十年代更難（嗰陣時左丁山起碼可以投稿去中國學生周報，雖則每一次都俾編輯陸離大姐投籃！），新鴻基地產贊助呢個文藝活動，幾有意思。
收完袋禮物就出門去旺角豉油街2號希爾頓花園酒店嘅鷹巢中菜廳，點解由中環去旺角食飯呢？皆因二十幾年不見嘅舊同事關夢南最近見報，左丁山問報社攞到佢嘅電話，約佢午飯一聚，關兄話家住旺角，於是咪去旺角囉。呢間酒店嘅業主係一間發展公司擁有，公司老闆就係新亞校董會主席梁英偉校友，搵梁兄秘書訂位，話都冇咁易。呢間鷹巢中菜，價錢比朗豪坊明閣起碼便宜三分一，以叉燒馳名（到此必須一試），點心亦相當可口，如不嫌自旺角地鐵站行路七分鐘來此，鷹巢嘅性價比係好高嘅，中午飲茶好地方也。
關夢南兄昔年在星島日報係「文藝氣象」版編輯，接納年輕人投稿，甚受歡迎，當年（一九九二至九三）係全港報章唯一文藝版，當年不覺怎麼樣，但文學係悠久建成嘅，當年年輕投稿作者，今天已有名氣嘅，左丁山記得有董啟章、樊善標、關麗珊等人，成績相當不錯，可惜後來文藝氣象版停刊，無以為繼，二十餘年來，香港青年人苦無園地發表作品，相信必有人因此而出不了頭！好多人埋怨今日香港下一代嘅中文水準低落，考DSE中文成績差，其實成年人亦要諗吓，為何幾乎所有報刊公開文藝園地皆已停辦？關夢南自報界退休後，唔係幾服氣，憑一己之力，又再辦文藝刊物，明天再講。