常在陸羽茶室見到嘅老友，近來不時要去睇醫生，常見病痛就係手痛、腳痛、腰痛、膝頭痛一類，多數係益咗骨科名醫，大抵啲50後、60後，人人都相信要維持健康，必須有運動，所以自結婚成家立室之後，就主動去運動健身，最常見嘅就係跑步，緩步跑，跑馬拉松，打網球，高爾夫球，羽毛球或乒乓球，當然還有人日日游水，不一而足。好嘞，三十幾四十年後，左丁山身邊嘅朋友，除咗泳友之外，幾乎人人要睇骨醫，唔怪得老友骨科名醫醫生K嘅診症室，日日坐滿人。
人生六十歲以後，無病無痛就是最大幸福，一位富豪級打工皇帝對左丁山講：「現在每年再搵多一千萬，都係益咗仔女嘅唧，但昔日我細佬哥時，跟父母兄弟姊妹共八人住在北角新邨，日日望海嘅住宅單位，現在改建成海璇，呎價高達近五萬元，我地當時嘅單位如用今日市價買番，大概要三四千萬，你話要留低幾多錢俾仔女先至夠吖！」林鄭特首嘅身家，怕都買唔起一個海璇千呎單位，真誇張，與其係咁追逐金錢，不如知足啲，追尋身體健康，追求優質生活好過。
朋友B三年前開始要帶枴杖出街，最近睇蔡瀾在星期日蘋果寫及喺巴黎買枴杖（士的），不勝羨慕，認為蔡瀾認真識享受兼知識豐富，連對士的都咁有考究，左丁山對朋友B笑曰：「講身家你會多過蔡瀾都唔定，論享受精彩生活，蔡瀾就遙遙領先咯，蔡兄以飲飲食食著名，天下美味盡遍嚐，飲食之外，又寫書法辦畫廊，收藏不少趣味玩意，令你覺得佢好似一日有七十二小時咁，能夠學曉咁多種精緻學問之餘，還有時間周遊環球美景，我地拍馬都追唔上。」朋友B自嘆弗如，承認自己在中環四十年，營營役役，只懂得一樣嘢，就係搵錢，依家退休靜下來，先知道原來自己唔識如何嘆世界，於是多睇蔡瀾文章，希望學番一兩招。都係無謂學咯，好多嘢係學唔嚟嘅，例如蔡瀾寫行草書，點學呀！不如好好欣賞蔡瀾行草就算。北京榮寶齋都邀請佢去開書法展──「草草不工──蔡瀾行草展」，於10月27日至11月1日假北京榮寶齋舉行，還在10月28日發表演講。其實蔡瀾點止係食神咁簡單，佢家學淵源，父親收藏不少榮寶齋珍品，蔡瀾自幼學習，先至有今日成績嘅啫，文化修養要日積月累，中環人大多掛住積累金錢，自不然對精緻生活文化有所欠缺。