劉小麗被政府DQ議員資格之後，就少有喺立法會出現，不過佢透露今個月將會再度現身立法會。立法會墟市事宜小組委員會近幾次會議，原來都會請團體代表同政府討論墟市政策，而小麗將會代表「小麗民主教室」出席會議，名副其實「重返議會」。
小麗接受《蘋果》查詢時就話，下星期二同埋月底舉行嘅墟市小組，佢都會出席會議，要求現屆政府就墟市政策找數，又話即使冇咗議員身份，仍然唔會放棄推動墟市、安老嘅工作，會繼續同民間團體一齊努力。
講到未來有咩搞作，小麗就話嚟緊農曆新年將會再喺深水埗搞桂林夜市，佢仲話已經多咗好多團體加入，大家真係要密切期待喇！