由前特首曾蔭權2010年成立嘅關愛基金，成立初期獲得唔少大孖沙億億聲嘅捐款，係威係勢咁，政府亦用關愛基金搞咗好多一次性派糖，好似代政府派糖畀N無人士。不過事隔多年，關愛基金捐款數字連年下跌，噚日財委會會議就有議員追問今年關愛基金捐款數字，民政事務局代表顯得尷尷尬尬，原來截至今年9月，本年度捐款只得4.1萬元！
民主黨鄺俊宇聽到都愕咗一愕，話過去年年億億聲嘅捐款竟跌至幾萬元，要求政府作出跟進，仲話要幫政府「告急」。至於公民黨楊岳橋亦都話4.1萬元唔合常理，「仲慘過東華」，建議政府要鼓勵市民認識關愛基金，並提供恒常嘅捐款方法，等關愛基金做得更好喎。雖然議員對關愛基金嘅籌款數字唔多滿意，不過保留關愛基金秘書處，一個首席助理秘書長職位嘅撥款，最後獲得財委會通過。