政府噚日公佈最後兩位政治助理人選，由43歲嘅前商台新聞及公共事務副總監何翠萍做財政司司長政治助理；食物及衞生局政助就由38歲嘅醫管局服務轉型部行政經理鄭守崗出任，即係話之前盛傳會做呢個位嘅《城市論壇》主持蘇敬恆，入熱廚房嘅機會正式落空。
喺商台做咗超過20年嘅何翠萍係財經記者出身，舊年係新聞行政人員協會主席，喺商台做《經濟脈搏》主持。
何財記出身 曾質詢波叔
年初預算案嘅財政司司長熱線聯播烽煙節目，何翠萍仲質詢過𠵱家做咗佢老闆嘅財爺陳茂波。同陳茂波一樣，何翠萍都係基督徒，公餘時間仲去神學院度讀基督教研究文憑。佢先生麥沛泉亦係基督教中人，以前喺明光社嘅友好組織「性文化學會」做事工主任，呢個會大力反對同性戀同《性傾向歧視條例》立法，又曾經出書鬧爆支持平權嘅前平機會主席周一嶽；𠵱家就喺新基督教組織「公理匯研」做總幹事，除咗繼續講性別議題，仲會涉獵到政治同財政司負責嘅土地政策，第日可能都要申報定利益喇。