韓國女生Ella嚟過香港超過十次，佢話：「我鍾意食蛋撻、飲茶、點心，去過銅鑼灣、尖沙嘴、旺角，同香港朋友去過唱K Party，上次嚟香港撞正十號風球，乜都冇開，好慘呀！」聽落Ella好似半個香港人咁，原來佢男朋友係香港人！
Ella三年前做空姐嘅時候，遇上香港仔機師Daniel，譜出港韓戀，「當時Daniel好鍾意聽K-Pop，鍾意EXO，嗰陣仲以為佢係gay，因為冇聽佢講鍾意少女時代嗰啲女團。」Ella話當時佢對香港都有啲認識，令Daniel覺得好驚喜，「因為好多香港人都習慣咗，外國人用普通話同佢哋打招呼，而我知道廣東話嘅『你好』點講，所以當時Daniel『嘩！』咗一聲。」
原來Ella早喺五年前，去紐西蘭讀書嘅時候，就同香港結緣。佢話當年寄宿舍嘅媽媽好鍾意香港，成日向佢推薦香港美食，「寄宿舍嘅媽媽推薦我試芒果布甸，話好好味。」於是，Ella讀完書，返韓國之前，嚟咗香港旅行，「寄宿舍嘅媽媽幫我聯絡咗一位佢接待過嘅香港學生，嗰位香港女仔好好，畀我喺佢屋企住，又帶我去玩，仲幫我整咗張八達通添！」
之後嗰位香港女生同朋友一齊去韓國玩，Ella就接待返佢哋，Ella媽咪仲親自下廚，整咗一餐豐富嘅韓式料理，又一齊飲酒，「乾杯！One Shot！飲杯！飲杯！」大家玩得好開心，Ella父母對香港人都留有好印象，唔反對囡囡同香港仔拍拖。
o依家Ella無做空姐，返咗韓國打政府工，男友繼續喺越南做機師，係真正Long D，強調「真」，係因為Ella聽過有港式Long D！Ella話，「喺韓國成日都搭一、兩個鐘地鐵，係正常事，但係香港朋友話，如果要坐一個鐘地鐵搵一個人，就唔見、唔拍拖，話太遠喇！」Ella覺得呢件事好有趣。
而有種港式文化，令作為韓妹嘅Ella鬼咁歡喜，「香港人早餐都去茶餐廳食，我覺得好驚訝，因為喺韓國，女人朝早都要煮飯畀老公或者屋企人食。我幾鍾意呢種方式，我可以懶啲吖嘛！」
雖然Ella有香港男友，同一班香港朋友，不過未來都未必會定居香港，「香港樓價太貴喇...可能韓國打工賺錢，返香港旅行係最好嘅選擇。」
《仙遊首爾》重溫：
http://hk.apple.nextmedia.com/enews/animation/kfans/
記者：阿仙
攝影：峰
編審：Kaman
更多娛聞，喺晒《娛果》
http://fb.com/appledailyent