自由黨榮譽主席田北俊近年人氣有增無減，早排拍住薯片叔叔曾俊華做慈善嘢，唔知係咪見薯片叔叔又拍片又唱歌做義工咁好玩，田少自己都玩埋一份，佢噚日就喺fb po咗佢為「時尚未來挑戰大獎」所拍嘅短片，粉墨登場化身「執葉大偵探」金田北，夥拍《警訊》御用奸人、人稱堅哥嘅吳良榮，一齊調查服裝界大嘥鬼嘅案件。
呢條片戲名叫「金田北の速食女棄衣事件」，講述由《警訊》御用女騙徒馬溱禧扮演一名港女大嘥鬼，啲衫買咗返嚟，整污糟咗少少就話唔要，有時甚至連着都未着過就話唔要。於是乎金田北就登場，調查港女亂買衫嘅案件。
粉墨登場籲珍惜衣物
田少飾演嘅金田北係自稱為「執葉大偵探」，好明顯係幽咗何君堯一默，都算係神來之筆，劇情仲講金田北查案用埋「衣物傳心術」去了解吓啲被遺棄嘅衫究竟係咩情況，明顯抽早排踢爆寵物傳心師單新聞嘅水。
金田北查完之後就輪到堅哥出場喇。今次堅哥唔做壞人改行做警察，用佢嘅念力去拘捕大嘥鬼港女，仲教訓港女，就算啲衫污糟咗都唔緊要，事關今時今日有啲高科技布料可以自我清潔，曬吓太陽就可分解污物同氣味，而且具備防水、防皺、防油同防污。
雖然金田北同堅哥並冇同場嘅戲，但勞煩到兩位粉墨登場，其實就係為咗「時尚未來挑戰大獎」宣傳。
短片去到最後，田少同黨友自由黨黨魁鍾國斌，一齊現身呼籲有創意嘅學生們參賽，因為時裝界需要更多構思、更多創意咯。
李八方