因被乘客多番批評，常客計劃馬可孛羅會（Marco Polo Club）擁有過百萬會員嘅國泰航空（圖），俾乘客鬧足成年，終於肯調低綠卡會員嘅續會門檻。話說國泰舊年4月，突然改咗馬可孛羅會嘅計分方法，飛長途嘅商務客易咗儲分續會，但最低級別嘅綠卡會員續會門檻就大幅提高咗，每年最少來回台北10次先至夠分續會，結果篩走大批儲唔夠分嘅舊客。
唔少國泰擁躉俾人踢出會，事隔年半，國泰噚日宣佈今年12月8號起出發嘅航班，開始實施新計分法，綠卡續會門檻大幅調低，由𠵱家要求嘅100分降到20分，兼同時加亞洲區短途航程分數，變飛兩次台北來回都夠分續綠卡。其實綠卡會員嘅禮遇相當有限，除咗可以享用優先辦理登機手續同登機，都要儲夠200分先換到入商務貴賓室一次。消息一出，唔少被踢出會嘅苦主都去國泰fb訴苦，有人仲鬧佢舊年改制，直頭令人冇咗支持本土航空公司嘅心喎。