周四歐霸盃分組賽I組賽事，葡超球隊甘馬雷斯喺主場1:0小勝馬賽，賽前出現球員怒踢球迷事件。曾效力曼聯與祖雲達斯，馬賽嘅法國守將艾拉，喺賽前同隊友一齊熱身，冇幾耐就同場邊部份馬賽球迷發生爭執，之後艾拉竟施展功夫飛腿，踢中球迷個頭，艾拉隨即領紅被逐。據報係有馬賽球迷因為唔妥艾拉喺今季嘅表現，突破防線走到廣告牌後向艾拉指罵，艾拉亦不甘示弱反擊，之後更怒踢其中一名球迷，球證保格拿見到即刻向艾拉出示紅牌。今次係歐霸盃喺2009年成立以嚟，首次有球員喺開波之前被逐。馬賽事後發聲明，話會方已展開內部調查，強調一個專業球員面對挑釁嘅時候都應該保持冷靜。聲明又話，嗰班侮辱艾拉嘅球迷係「偽球迷」，同時亦譴責佢哋嘅行為。