WhatsApp出自刪功能，發訊後，七分鐘之內後悔者可以刪除訊息。新刪功能，七分鐘，簡直是替777度身訂造。禮賓府深夜兩點鐘的主人房中，白襪仔（老公花名）賣力按摩小腿時，奶媽舒服地幻想：
一，將八十萬公屋呢個無零頭的盲數，永遠刪除。與董建華自稱「不存在」的八萬五一樣，大家當呢個係不幸數字，比十三更不祥OK？自刪柒次，無再提啦。
二，一地兩檢，再三步走嗎？阿爺唔多like，這個家嫂辦事咁唔令人放心，點得呢，比陳健波更無面啊。一於使橫手，三步刪減剩0.5步，令全體泛民輸隻腳趾尾！戰娘發功，廢掉立會非建制武功，斬、廢、DQ出齊。完美示範，777，打得，刪得，除得。
三，自問鎚心扑命日日為香港籌謀，做到凌晨兩點都未瞓得，但市民俾嬲俾到上鼻哥，委屈啊！唔發威當病貓，一於吩咐常秘更多更密地「關注一下」那個他他條條講「香港故事」的失業大叔。不排除「關注」會升級，唔使習帝開聲，港台等住被刪除啦。
想得入神的奶媽，小腿一陣涼意，發現白襪仔倦極枕在自己腿上，已經睡着，嘴角掛着口水柱。她摸出手機偷拍了兩張，瀏覽通訊錄七分鐘，諗唔到可以把照片WhatsApp給誰。