支聯會嘅六四紀念館因一直俾所在大廈法團以法律同行政方式打壓，於2016年底閉館，另覓館址，當時支聯會希望兩年左右可以搵到地方，但𠵱家仲有個零月就到2018年，八方聽聞六四紀念館仲未搵到合適館址。
八方問過支聯會秘書李卓人，阿人話有睇過一啲地方，但有過上次俾大廈法團打壓經驗，今次佢哋搵地方都好小心，所以到𠵱家都未有着落，佢又話其實佢哋諗緊一啲永久館址嘅方案，但因為未成事唔方便講，以免壞大事，但就算搞得成，都趕唔切出年六四前開幕，所以佢哋都係預到2019年六四事件30周年，永久六四紀念館先開幕，所以怕且支聯會明年要繼續用住臨時六四紀念館先。